Alhamdu lillah bayan kawo Tarihi da kuma wasu daga cikin darussa na rayuwa mai albarka na A'imma (AS) wato tun daga Imam Ali (AS) Har ya zuwa Imam Mahdi (AS) Haka nan an kawo Tarihi na Manzon Allah (S) Da Sayyida Zahra (AS) Da kuma wasu daga rayuwar su mai albarka, dukkansu dai an kawo bayanan ne a takaice, to yanzu insha Allah a wannan sashe za'a juya zuwa ga Jarabawowin da kowane Imami ya fuskanta a zamaninsa ta fuskacin masu tafi da iko, da kuma jarabawowin da ya fuskanta daga mutanen gari, bayan haka kuma daga jarabawowin da ya fuskanta daga mabiyansa da dai sauransu. Zamu fara insha Allah daga Imam Ali (AS) Har ya zuwa Imami na Karshe, saboda haka abin zai dauki lokaci tun da za'a bisu daya bayan daya har a kammala, kasantuwar Jarabawowin da A'imma (AS) suka fuskanta a zamunnansu sun kasu kashi biyu, akwai jarabawar da dukkansu sun yi tarayya a ciki sune kamar guda ukku: 1-Kwace tafi da iko daga hannunsu a zahirance saboda sune Manzon Allah (S) Ya ayyana ma wannan al’umma da su khalifance shi a bayansa. khudubar da Manzon Allah ya yi a Ghadir hujja ne akan haka saboda haka kowane Imami a zamaninsa shine yake da hakkin ya tafi da iko, akasin haka kwace ne, wani tambihi a nan kasantuwar basu suka tafi da iko ba, ba yana nufin wannan matsayi na su ya canza a wajen Allah bane wato suna nan a matsayin na khalifofin Manzon Allah sun yi shugabanci ba su yi ba. 2- Sun yi musharaka na ganin zaluncin da ake yi ma al’umma amma basu da ikon yin komi akai, mutum ya bibiyi Tarihi ya ga kowane irin zaluncin da Azzaluman zamaninsa suka yi ma Jama’a misali a lokacin Imam Zainul Abidin (AS) Dubi abinda Yazidu (LA) yasa aka yi ma Mutanen Madina da dai sauransu. 3- Sun yi musharaka wajen ganin jirkita wasu ababe na Masulunci da aka yi kuma aka gina mutane akan jirkitaccen wasu ma sun wanzu har ya zuwa wannan zamani namu misali a watan Muharram yadda aka kago hadisai na cika-ciki da kuma yelwata ma iyali a ranar Ashura da dai wasu Hadisai wadanda aka kirkiresu kuma aka gina mutane a kai. Idan mutum ya yi bincike zai ga wadannan ga sunan birjik, misali lokacin da tafi da iko a zahirance ya dawo wajen Amiril mu'uminin Ali (AS) ya nemi ya hana sallar Asham wanda mutane suke yi a watan Azumi tun da bidi’a ce, hatta wanda yasa ayin wato Umar da yake ana yi ya ce madalla da wannan bidi’ar saboda a lokacin Manzon Allah ba'a yi haka ba. to da Imam Ali ya nemi ya hana mutane kusan tawaye suka yi kasantuwar mutane sun gini akai kasa da shekaru hamsin bayan wafatin Manzon Allah (S) To ina gamu a wannan zamanin, wasu ababe da aka kirkira aka gina mutane akai sama da shekaru dubu. Shi yasa daga cikin jarabawowin da Imam Mahdi (AF) Zai fuskanta akwai wannan saboda zai dawo da Addinin Musulunci kamar yadda yake a lokacin Manzon Allah kuma a Duniya baki daya wato da kasashen Musulmi da wadanda bana Musulmi ba. Baya ga wadannan jarabawowi da suka yi tarayya akai to kowane Imami akwai nau’in jarabawar da ya fuskanta a zamaninsa misali nau’in jarabawar da Imam Hassan (AS) ya fuskanta tana da banbanci da wadda Imam Husain (AS) ya fuskanta, Kuma kowannensu da zamanin dayan yake to haka zai yi, misali matsayar da Imam Hassan ya dauka na sulhu da Mu'awiya in da Imam Husain ne a zamanin to shima matsayar da zai dauka kenan haka nan in da Imam Hassan ne a lokacin Imam Husain to abinda Imam Husain ya dauka na yaqi shima shi zai yi. Bayan wannan ‘yar shinfida yanzu insha Allah za'a fara da Imam Ali (AS). Imam Ali (AS) Ya fuskanci jarabawowi masu yawa a rayuwarsa kai har ma da bayan rayuwarsa saboda akwai wasu ababe sai bayan shahadarsa aka kago su aka jingina masa. Da farko dai bayan rasuwar Manzon Allah ko mako guda ba'a yi ba, aka zo za'a kona gidansa da sunan wai dole yazo ya yi bai’a shi da wadanda ke tare dashi a gidan, alhali hakkinsa ne kuma Manzon Allah ya bayyanar da haka kasa da kwana 100 da zuwa gidansa za'a kona, saboda idan mutum ya yi lissafi tsakanin Ranar Ghadir da rasuwar Manzon Allah kwana saba’in ne ba wai shekaru aka dauka ba, a takaice dai abubuwan da suka faru sun faru a lokacin, mutum ya tambayi Tarihi mi ya faru zai bashi amsa. Bayan haka Imam Ali ya tattara Alkur’ani mai girma wadanda suka amshe iko suka ce basu son nashi, saboda bayan rasuwar Manzon Allah abinda Imam Ali ya soma yi shine shirin jana’izar Manzon Allah (S) Bayan jana‘izar Manzon Allah abu na biyu da Imam Ali ya yi shine tattara Alkur’ani waje guda, domin har Manzon Allah ya bar Duniya Alkur’ani ba an tattara bane waje guda, to suka ce basu son wadda Imam Ali ya tattara to haka abin ya cigaba a wajen sai lokacin kalifancin Usman dan Affan suka tattara shi waje guda. Mu a i'itikadinmu Alkur'ani tsararrene wato Allah ya tsare shi babu ragi babu kari wato duk irin tasarrufin da masu tafi da iko suka yi akan Hadisai to shi Alkur’ani Allah ya tsare sai dai mutum ya kago Hadisi ko ya jirkita shi ta hanyar ragi ko kari amma ba dai Alkur’ani ba shi Allah ya kare shi, kamar yadda Allah Ta’ala yake cewa a cikin Alkur’an, “Mune muka saukar da Ambato-Alkur’ani- mune kuma masu kare shi” Shi yasa masu surutan cewa wai ‘yan shi'a na da wani Alkur’ani dabam dana sauran musulmi to mai irin wannan tunanin ko maganar to kamar bai yadda da abunda Allah ne ya ce ba wato na kare shi Alkur’ani, kuma masu irin wannan tunanin, ‘yan shi’a sun sha yi masu kule, akan to su kawo Alkur’ani aga ni, na san ko ni ma a shekarun baya mun hadu da wani dan kungiya to sai yake ce man ai ‘yan shi'a na da Alkur’ani dabam, na ce masa duk ba gaskiya ba ne, to a lokacin akwai Alkur’ani tare dani kuma bugun Iran sai na fito dashi na mika masa, na ce ya duba daga ina aka buga shi sai ya ga ansa Qum-Iran na ce, to ya bude ya karanta duk Surar da yake so ya ga ta yi dai dai da yadda ya sani ko ta saba, ya bude nan, ya bude nan daga karshe da bakinsa ya ce lalle yadda ya karanta haka ya sansu shi bai ga wani bakon abu ba, amma duk da haka ya ce to su dai haka ake ce masu wai ‘yan shi'a na da Alkur’ani dabam, to sai na ce in zaka hukunta mutum ko mutane zaka hukunta sune da abunda ka gani ba abinda aka ce maka na karyayyaki ba akansu. Dawowa ga maudu’in to haka Imam Ali ya kasance a kebance in kaga an neme shi to wasu ababe ne suka cukurkude musamman a fagen ilimi basu san mafita ba sai akawo masa domin ya warware, idan mutum ya bibiyi zantukan wadanda suka yi kalifancin zai ga haka misali wata magana ta Umar da yake cewa, “Allah ya tsare Kada na kasance cikin wata matsala wato ta ilimi wanda baban Hassan bai ciki wato domin ya war ware". Akwai kuma lokacin da yake cewa ka da wani ya ba da fatawa a cikin masallacin Manzon Allah alhali Ali yana nan. A kwai fadin Usman dan Affan da yake cewa, “Ba domin Ali ba to da Usman ya halaka.” To haka dai Imam Ali ya kasance har lokacin da khalifanci a zahirance ya dawo a hannunsa, kuma jama’a ne suka ce shi suke so, sabanin wadanda suka gaba ce shi na khalifofin, misali Abubakar mutum ya binciki yadda zabensa ya kasance a Saqifa, baki daya a cikin sahabbai muhajirin su ukku ne a wajen wato daga Abubakar sai Umar sai kuma Abu ubaida sai kuma wasu daga cikin Ansarawa su suka zabe shi. Shi kuma Umar, Abubakar ne ya zabe shi ba tare da shawarar kowa ba, ta nan mutum idan yai tunani tun da sun ce Manzon Allah bai zabi kowa ba wai ya bar wa Al'umma ta zaba, to mi ya sa shi Abubakar bai bi wannan sunna ta Manzon Allah wato ya bar jama’a su zaba? To shi kuma Umar sai ya kafa kwamiti na mutum shida cewa wai su zabi khalifa to shine suka zabi Usman. To shi Ali mutum ya karanci Tarihi jama’a ne suka ce shi suke so, saboda idan mutum ya duba zai ga cewa Imam Ali shi ka dai ne yake da Nassi daga Manzon Allah da kuma zabin mutane amma daga karshe, to lokacin da yayi wannan khalifanci na Zahiri, wadansu wadanda basu su suka haifar da matsaloli masu yawa wanda har ya kai ga yaqoqi har guda ukku sune:

1-Yaqin Jamal.

2- Yaqin Siffin.

3- Yaqin Nahrawan. Ga bayaninsu a takaice.

YAQIN JAMAL
Dangane da wannan yaki bayani zai kasance kan wadannan ababe:

A- Abinda ya sabbaba wannan yaqin.

B- Wadanda suka jagoranci wannan yaqin.

C- Yaushe wannan yakin ya auku.

A- Abinda ya sabbaba wannan yaqin: Bayan kashe Usman sakamakon yadda ya tafi da Mulki da kuma Fifita Bani Umayya kan sauran sahabbai da kuma sauran ababe da ya aikata ta kai ga wasu daga cikin Sahabbai suka ce a kashe shi tun da sunyi-sunyi ya canza bai canza ba, daga cikin masu cewa a kashe shi akwai Aisha, Dalha da Zubair, kai ta kai Dalha da Zubair suka je gidansa da nufin aiwatar da wannan kisa, Lokacin da wadannan al’amura suke faruwa Imam Ali ya nisanci wannan kwamacala. A gefe guda kuma lokacin da wadannan ababe ke faruwa ita Aisha ba ma ta Madina tana Makka ne, amma tana goyon bayan abubuwan da ake so ayi. 
kwatsam sai labari ya sameta akan cewa an kashe Usman bayan haka ta ji cewa Jama’a sun zabi Ali a matsayin Khalifa,jin haka sai ta canza matsayi ta jingina ma wa’iyazu billah Imam Ali wannan kisa ta ce dole kuma a dauki fansa, akan wannan asasi na daukar fansa, ta dunga zaburar da Mutane kuma ta bukaci Dalha da Zubair da suzo Makka su same ta, abin mamaki su Dalha da Zubair sune farkon wandanda suka soma yi ma Imam Ali Bai’a kuma sune farkon wadanda suka warware ta, shi yasa da suka je wajen Imam Ali akan zasu tafi Makka wai aikin Umura, kasantuwar yasan manufan zuwansu Makka shine ya ce masu to su jaddada Bai’arsu, bayan isar su Makka, suka yenke shawara da Aisha akan su bar Makka su tafi Basra saboda a can suna ganin zasu samu magoya baya fiye da Madina da kuma Makka to shine suka kama hanya zuwa Basara a lokaci guda kuma suna harraka mutane kan daukar fansa, saboda ita Aisha har ta aika ma Hafsa ‘yar Umar akan tazo ta same ta su tafi Basara, Ummu Salma tai mata nasihohi yasa bata fita ba, a takaice dai lokacin da wannan al’amari yake gudana sai da ta kai Imam Ali saboda abice wutar Yakin ya aika Imam Hassan a lokacin cewa yaje Rakumin da Aisha take akai a san yadda za'a kwantar dashi to ganin rakumin Aisha an kai shi kasa to shine yasa da yawa kawai, sai suka mika wuya tun da sun fahimci an samu galaba akansu, amma a cikin wannan yaqin aka kashe Dalha da Zubair, shi Dalha, Marwan ne dan Hakam ya kashe shi tare da cewa ya san yana cikin rundunarsu amma kasantuwar yasan cewa sune suka yi tsayin daka wajen kashe Usman. Shima Zubairu daga baya ana cikin yaqin ya juya zai bar yaqin wani ya kashe shi, shima cikin dan rundunarsu. A takaice dai haka Imam Ali ya samu galaba akansu, yasa a maida Aisha Madina duk da abubuwan da ta yi ya kyautata mata ya hada ta da dan uwanta Muhammad dan Abubakar cikin wadanda zasu raka ta Madina, shi Muhammad dan Abubakar duk da cewa Aisha a matsayin yaya take a wajensa amma a wannan yaqi ya kasance cikin Rundunar Imam Ali ne.
B- Wadanda suka jagoranci wannan yaqin: Wadanda suka jagoranci yaqin a daya bangaren sune Aisha, Dalhatu dan Ubaidullah da kuma Zubairu dan Awwam.
C- Yaushe wannan yaqin ya auku: Yaqin Jamal ya auku ne a ranar 10 ga watan Jimada-Ula shekara ta 36 bayan Hijira.

YAQIN SIFFIN
Siffin sunan waje ne kusa da Sham, kuma shi yaqi ne wanda ya gudana a daya bangaren karkashin jagorancin Mu'awiya dan Abu Sufyan, to shi Mu'awiya a lokacin yana matsayin Gomnan Sham ne, Umar dan Kaddab ne ya nada shi a wannan matsayi, da Usman ya zo ya dada tabbatar dashi har ma da kara masa wasu yankuna, to da Mu'awiya ya ji cewa Ali ne Jama’a suka zaba a matsayin khalifa, sanin Mu'awiya da cewa lalle Ali ba zai bar shi a wannan matsayi ba saboda bai cancanta ba saboda shi Mu'awiya baya cikin Muhajirun baya cikin Ansar wato daga baya wai ya Musulunta a Fatahu Makka, to shine yaga abinda zai yi kawai shine ya haddasa yaqi da sunan wai daukar fansa na jinin Usman, to shine Mu'awiyan ya aika ma Amru dan As lokacin shi kuma yana gwamna ne a Falasdin akan ya zo ya same shi a sham su hada runduna su yaqi Ali, shi kanshi Amru dan As da ya ji haka abin ya bashi mamaki yasan cewa lalle babu hannan Ali a cikin wannan lamari, kuma yaga cewa lokacin da Usman yake cikin halin da yake ciki wane abu shi Mu'awiyan ya yi amma kasantuwar Mu'awiyan ya yi masa wasu alkawurra da in yazo zai bashi to shine ya zo ya same shi, suka hada runduna, wannan yaqin ya gudana a wajen da ake ce ma siffin, to da Mu’awiya yaga za'a samu galaba akan su sai yace ma Amru dan As wai babu wata dubara da za'a yi ne , to shine sai Amru yace masa a ce mayaka su samu Alkur’ani su daga a ce a zo yayi hukunci tsakanin mu, to suna yin haka sai wasu daga cikin rundanar Imam Ali suka ce tun da sun ce a zo ga Alkur’ani ai ba bukatar cigaba da yaqin, Imam Ali ya ce yaudara ce, an fake da haka ne kawai, to wannan yanayi ya haifar da wasu gungun mutane da ake ce ma Kawarij, wadanda suka dage akan sai dai a dakatar da yaqin, shi kenan yaqi ya dakata, aka ce kowace runduna ta bada wakili domin tattauna yadda za'a dakatar da yaqin to shine shi Mu'awiya ya bada Amru dan AS shi kuma Imam Ali ya ce Abdullahi dan Abbas, wadannan gungu na mutane suka ce basu yarda ba wai sai Abu Musa Al-ash’ari, to su biyun suka tattauna tsakaninsu daga karshe suka cimma matsayar cewa kawai Mu'awiya ya sauka hakan ma Ali, amma suka a je zasu shelanta haka a bainar Jama’a to shine da suka zo bainar Jama’a sai Amru ya ce Abu Musa ya fara Magana, to shine ya ce mun cimma matsayar cewa Ali da Mu'awiya su sauka, saboda haka na tube wanda nike wakilta, shi kuma Amru sai ya ce kunji abinda ya ce to ni na tabbatar da wanda nike wakilta. Haka dai wannan yaqi ya kare tare da shahidai masu, domin yazo a tarihi cewa a rundunar Imam Ali an samu shahidai wajen 25,0000 daga cikinsu akwai Ammar dan Yasir lokacin yana da shekaru sama da 90 a Duniya a lokacin da aka kashe shi sai da yawa suka tuna da Hadisin Manzon Allah da yace ma Ammar wasu Jama’a ‘yan tawaye sune zasu kashe ka, a bangaren Mu'awiya kuma an kashe wajen 45,000.

YAQIN NAHARAWAN
Shi kuma wannan yaqin ya auku ne a 9 ga watan Safar shekata ta 38 bayan hijira, shi kuma yaqi ne da ya auku tsakanin kawarij da Amiril mu'uminin, asalinsu sun kasance mabiya ne ga Imam Ali amma daga baya suka yi tawaye, bayan haka kuma suka dun ga abubuwa na ta'addanci ga al’umma wato yau kaji sun kashe wannan gobe su kashe wancan kai akwai lokacin da Imam Ali ya aika masu da sako na nasihohi kan abunda suke aikatawa amma sai suka kashe wanda aka aika to shine Imam Ali ya yake su har ya kashe wasu jagororinsu. Daga cikin Akidunsu har da kafirta Imam Ali da Sauransu. Kuma wanda ya kashe Imam Ali wato Abdurraman dan Muljam shima Kawarij ne. Daga karshe mu dubi irin wadannan jarabawon da Imam Ali ya fuskanta ta fuskoki dabam dabam wato tun bayan wafatin Manzon Allah har ya zuwa Shahadarsa, yanzu da a ce an bi wasiyyar da Manzon Allah ya yi ne cewa Ali shine Khalifa a bayan sa to da dinbin ilimin da wannan al'umma zata gada zai kasance mai yawa ne domin ya rayu bayan Manzon Allah shekaru 30, Nahajul Balaga da muka gani a cikin Shekaru 5 da ya yi khalifanci na Zahiri aka samu wannan dinbin ilimi da ke cikin Nahajul Balaga.
Sai wasu darussa da zamu koya daga cikin wadannan Jarabawowi da Imam Ali ya fuskanta to muhimmi daga ciki shine Kyakkyawan aqiba a rayuwa, mu dubi wadannan mutane musamman kawarij wanda sun kasance mabiya ga Imam Ali amma daga karshe suka bashi baya, har ta kai daga cikin sune ya kashe Imam Ali (AS) a ce kana bin Ma'asumi amma daga baya kuma ka bashi baya. Wannan shi ake ce ma mummunan karshe. Allah Ta’ala ya kiyayemu daga mummunan karshe.